فلسطین اسرائیل جنگ بندی پر سنی بلال مسجد دوٹانکی ممبئی سمیت ملک بھر میں یوم تشکر منایا گیا

فلسطینیوں نے ثابت کردیا کہ بغیر قربانی دیئے فتح و کامرانی نہیں مل سکتی یہی جذبہ ایک دن بیت المقدس کی آزادی کا ضامن ہوگا 

حضرت معین میاں صاحب 

 

امت مسلمہ فلسطینی بھائیوں کی ہرممکن مدد کرکے انہیں یقین دلائے کہ ہم آپ کے ساتھ ہیں 

الحاج محمد سعید نوری 

پریس ریلیز ممبئی

 

فلسطین اسرائیل جنگ بندی کو لیکر جہاں امن پسند دنیا خوشی کا اظہار کررہی ہے وہیں امت مسلمہ نے بھی اپنے فلسطینی بھائیوں سے اظہار یک جہتی پیش کرتے ہوئے اس جنگ بندی کا نہ صرف خیر مقدم کیا بلکہ اہل فلسطین پر اللّٰہ کے فضل وکرم کی بارش پر آج جمعہ کو یوم تشکر منایا اور جگہ جگہ مساجد ومدارس میں علماء کرام و عوام نے اپنے رب کے حضور سجدہ ریز ہوکر شہدائے فلسطین کو یاد کیا اور ان کے حق میں دعائیں کی 

یاد رہے کہ قطر و مصر کی ثالثی میں امریکی صدر نے پندرہ ماہ کی طویل جنگ کے بعد جنگ کے خاتمے کا اعلان کیا جس کا نفاذ 19جنوری سے ہوگا جس میں کئ معائدے ہیں 

اس جنگ بندی پر گزشتہ روز رضا اکیڈمی نے خیر مقدم کیا اور جمعہ کو یوم تشکر منانے کی اپیل جاری کی تھی 

اس سلسلے میں آج ممبئی کی مشہور سنی بلال مسجد دوٹانکی میں معین المشائخ حضرت علامہ سید معین الدین اشرف اشرفی الجیلانی صاحب سجادہ درگا ہ مخدوم سمناں کچھوچھہ شریف وقومی صدر آل انڈیا سنی جمعیۃ العلماء کی سرپرستی میں دعائیہ تقریب منقعد ہوئ 

حضرت معین المشائخ نے اس موقع پر خوشی کا اظہار کرتے ہوئے کہا کہ آخر کار جدید ہتھیاروں سے لیس امریکی تعاون سے نہتے فلسطینیوں پر بم برسانے والے اسرائیل کا غرور خاک میں مل گیا اور اسے بڑی شرمندگی کے ساتھ یہ معاہدہ کرنا پڑا جس کا مطلب صاف ہے کہ اگر ایمان و عمل پختہ ہو تو دنیا کی سپر پاور کو بھی زیر کیا جاسکتا ہے یہ جذبہ و احساس دلایا ہے اہل فلسطین نے ہردن اپنے آل و اولاد کا لاشہ اٹھا کر بھی فلسطینی بھائیوں کے چہروں پر شکن نہیں آیا اور نہ ہی انہوں نے دنیا سے شکوہ کئے وہ بھوکے پیاسے رہکر بھی رب کی رضا پر راضی رہے یہ دکھایا ہے میرے فلسطین کے جیالے مسلمانوں نے 

حضرت معین میاں نے مزید کہا کہ یہ جنگ بندی مستقل ہو اور لولی لنگڑی اقوام متحدہ فلسطین کو آزادی دلانے غاصب اسرائیل کو کسی بھی صورت میں تسلیم نہ کرے اور فلسطین میں موجود فوجیوں کی مکمل انخلا ہو تاکہ فلسطینی بھائی کھل کر آزادی کی سانس لیں

آل انڈیا سنی جمعیۃ العلماء کے قومی صدر حضرت معین المشائخ نے آخر میں مسلم سربراہان مملکت سے اپیل کی ہے کہ یہ وقت قبلہ اول بیت المقدس کی آزادی کیلئے جدو جہد کا ہے اس لیے فلسطینی کاز کے ساتھ اولین مقصد ہمارا یہ ہو کہ قبلہ اول بیت المقدس کو یہودیت سے آزاد کرایا جائے 

اگر اتنی قربانیوں کے بعد بھی 

فلسطینیوں سے آپ کو محبت نہیں تو گویا کہ آپ نے اسرائیل سے قبلہ اول کا سودا کرلیا ہے جس کیلئے آپ سبھی مسلم سربراہان مملکت کو ایک نہ ایک دن بھاری قیمت ادا کرنی ہوگی 

اور وہ دن دور نہیں کہ تمہارا حشر بھی شام کے بشار الاسد جیسا ہو

اس لئے آپ سب سے اپیل ہے کہ وقت سے پہلے قبلہ اول بیت المقدس کی آزادی کیلئے اٹھ کھڑے ہوں 

رضا اکیڈمی جس نے آج یوم تشکر منانے کا اعلان کیا تھا مذکورہ تنظیم کے سربراہ قائد ملت الحاج محمد سعید نوری صاحب نے کہا کہ یہ ایمان والوں کی جیت ہے اور باطل کی ہار یہ اللّٰہ تعالیٰ کی طرف سے دیا گیا انعام ہے جو مستقبل میں اہل فلسطین کے عزم و استقلال کو بلند کرے گا 

حضرت نوری صاحب نے مزید کہا کہ اب جبکہ غزہ و رفح کھنڈرات میں تبدیل ہوگئے ہیں 

اشیاء خوردونوش کی فراہمی کا سلسلہ شروع ہونے والا ہے تو ہمیں چاہیے کہ ہم ہرممکن اقدامات اپنے جیالے فلسطینی بھائیوں کے لیے کریں 

اہل فلسطین نے پندرہ ماہ جو تکالیف و مصائب برداشت کئے ہیں اپنے رہنماؤں کی شہادتیں پیش کی ہیں تاریخ ہمیشہ ان کے ایمان و یقین کی گواہی دے گی اور آنے والی نسلوں میں شہادت کا جذبہ موجیں مارے گا 

اس لئے ضرورت ہے کہ روتے بلکتے بچوں ماؤں کا خیال کرتے ہوئے فلسطین سے اپنی محبت کا اظہار کریں 

اس موقع پر حضرت امان ملت علامہ امان اللہ رضا سمیت کثیر تعداد میں علماء و مقتدی حضرات موجود تھے